ចាប់តាំងពីមានជំលោះនៅតំបន់ក្បែរប្រាសាទព្រះវិហារ ដែរបង្កឡើងដោយក្រុមជ្រុលនិយមសៀមមក ក៏ចេះតែមានបញ្ហាមិនចេះ ចប់រវាង ប្រទេសកម្ពុជា និងសៀម។ បញ្ហានេះ បានធ្វើអោយកាន់តែ មានការប្រកាន់ពូជសាសន៍ រវាងខ្មែរ និងសៀម រូមទាំងមានការសំលាប់ក្រៅច្បាប់ យ៉ាងព្រៃផ្សៃ លើពលរដ្ឋខ្មែរ ឆ្លងដែនខុសច្បាប់ចូលក្នុងទឹកដីសៀម ទៀតផង។ ចុងក្រោយនេះ ប្រហែលជា ជ្រិញខ្លាំងពេកហើយ បានជារដ្ឋាភិបាលលោក នាយករដ្ឋមន្ត្រីឆ្លៀតឱកាស តែងតាំងលោក ថាក់ស៊ីន ស៊ីណាវ៉ាត់ត្រា អោយក្លាយជាទីព្រឹក្សាសេដ្ឋកិច្ចនៃ រដ្ឋាភិបាលខ្មែរ និងជាទីព្រឹក្សាពិសេស របស់លោក ហ៊ុន សែន ថែមទៀត។ ចុងក្រោយនេះ បំផុតនេះ លោក ហ៊ុន សែន បានហៅលោក ថាក់ស៊ីន ថា សំលាញ់អមតៈ និងជាជនរងគ្រោះនយោបាយ ។
លោក ថាក់ស៊ីន បានធ្វើដំណើរទៅដល់ប្រទេសកម្ពុជា ដើម្បីទទួលតំណែងថ្មីរបស់លោក ជាទីប្រឹក្សាសេដ្ឋកិច្ចនៃរដ្ឋាភិបាលកម្ពុជា
សង្រ្គាមពាក្យសំដីបាន ចាប់ផ្តើមឡើងរវាងនាយករដ្ឋមន្រ្តី នៃប្រទេសទាំងពីរ រហូតដល់ពេលមានការប្រកាសតែងតាំង ជាផ្លូវការ ដោយព្រះរាជក្រឹតនៃព្រះមហាក្សត្រខ្មែរ ។ នាយករដ្ឋមន្ត្រីប្លន់អំណាច អាពីស៊ីត បានប្រតិកម្មភ្លាម ដោយកោះហៅ ឯកអគ្គរាជទូតសៀម ត្រលប់ទៅស្រុកវិញ ជាវិធានការឆ្លើយតប។ រីឯខ្មែរវិញ ក៏កោះហៅឯកអគ្គរាជទូតខ្មែរ ត្រលប់មកវិញដែរ នៅថ្ងៃបន្ទាប់គ្នានោះ។ ព្រឹត្តិការណ៍នេះ បានបង្កអោយមានចំណោទ ទស្សនៈ និងការយល់ឃើញផ្សេងៗគ្នា ក្នុងការតែងតាំង លោក ថាក់ស៊ីន៖
រដ្ឋាភិបាលការពារ
ថានេះជាទង្វើត្រឹមត្រូវ ប្រកបដោយមនុស្សធ៌ម ដោយសារលោកថាក់ស៊ីន ជាជនរងគ្រោះខាងនយោបាយ ធ្លាក់ពីអំណាចដោយអំពើររដ្ឋប្រហារ។ លោកថាក់ស៊ីនជាមនុស្ស មានទេពកោសល្យ សមត្ថភាព និងជាមហាសេដ្ឋីជំនួញទូរគមនាគម៍ ផង ការតែងតាំងលោក ថាក់ស៊ីន ជាការព្យាយាមប្រើប្រាស់ធនធាន មនុស្សដើម្បីអភិវឌ្ឍន៍ ប្រទេសកម្ពុជា ដែលកុំពុងតែត្រូវការ ការវិនិយោគទុន។
ក្រុមបក្សប្រឆាំង និងសង្គមស៊ីវិល
បានរិះគន់ នឹងសំដែងការព្រួយបារម្ភថា ប្រទេសកម្ពុជា មានបញ្ហាជាច្រើន មិនទាន់ទាំង ដោះស្រាយរួចផង យករឿងថាក់ស៊ីន ស្រុកសៀមយកមកអំពុលទុក ធ្វើអោយខូចទំនាក់ទំនងការទូត នៃប្រទេសទាំងពីរកាន់តែខ្លាំង។ ហើយថា ថាក់ស៊ីន ជាជនជាតិសៀម ដែលសៀមមិនដែលបំរើប្រយោជន៍ខ្មែរទេ ក្នុងប្រវត្តិសាស្រ្ត មានតែចង់បានប្រទេសខ្មែរ និងមើលងាយខ្មែរ តែប៉ុណ្ណោះ។ ម្យ៉ាងវិញទៀត គឺវិស័យពាណិជ្ជកម្ម រវាង ប្រទេសទាំងពីរកាន់តែមានភាពតានតឹង ដែលអាចនឹងប៉ះពាល់ដល់ ជីវភាពនៃអាជីវករតាមព្រំដែន។ ក្រៅពីនេះនៅមានកកម្មករខ្មែរ ទាំងខុសច្បាប់ និងស្របច្បាប់នៅប្រទេសសៀម រាប់ម៉ឺន នាក់ ដែលអាចនឹងប្រឈមមុខនឹង សុវត្ថភាពផ្ទាល់ខ្លួន។
យោបល់ទាំងអស់នោះសុទ្ធតែមានហេតុផល រៀងៗខ្លួន។
ខ្ញុំវិញ! គិតថារដ្ឋាភិបាលខ្មែរ ម្តងនេះ ប្រើយុទ្ធសាស្រ្ត មួយនេះប្រហែលជាប្រសើរ សំរាប់កម្ពុជា ជាជាងពន្យាពេល ការចរចារមិនដាច់ស្រេច ដោយសារ អាសៀម ប្រើលេសមិនឈប់។ អាក្រក់បំផុតនោះ អាពីស៊ីត (នៅពីក្រោយខ្នងដោយស្តេច) ប្រើប្រាស់ជំលោះផ្ទៃក្នុងរបស់ខ្លួន ដាក់សំពាធ ប្រទេសកម្ពុជា នេះជាសំដីរបស់ លោក ថាក់ស៊ីន ផ្ទាល់។
យុទ្ធសាស្រ្តនេះ ត្រូវបានប្រើប្រាស់ច្រើនលើកច្រើនសារ មកហើយ ក្នុងការបំបែកបំបាក់គណបក្សណា ដែលមានកំលាំង ប្រឈមនឹងគណបក្សប្រជាជនកម្ពុជា ដូចជា៖ គណបក្ស ហ្វ៊ុន ស៊ិន ប៉ិច , គណបក្ស ជាតិខ្មែរ ក្រោយមកដោយសារយុទ្ធសាស្រ្តបំបែកហ្នឹង ក៏ក្លាយជាគណបក្ស សម រង្ស៊ី វិញ។ ពេលនេះហ៊ុនសែន ប្រើប្រាស់យុទ្ធសាស្រ្តដដែល របស់គាត់ ជាមួយនឹងប្រទេសសៀមម្តង សូម្បីតែអ្នកវិភាគនយោបាយសៀម ក៏និយាយដែរថា លោកថាក់ស៊ីន ប្រើប្រាស់ ប្រទេសកម្ពុជា ជាទីតាំងដើម្បីទំនាក់ទំនង នឹងអ្នកគាំទ្រអាវក្រហមរបស់គាត់ ក្នុងប្រទេសសៀម។
បើសត្រូវរបស់យើង ខឹងនឹងយើង មានន័យថា យើងធ្វើត្រូវ តែបើសត្រូវយើង សរសើរយើង មានន័យថាយើងធ្វើខុស។ ពាក្យនេះ សម្តេចឳ នរោត្តម សីហនុ ធ្លាប់បានមានព្រះបន្ទូល គឺជាសភាសិតដ៏ត្រឹមត្រូវ។
បន្ទាប់តទៅនេះ យើងត្រូវរង់ចាំមើល ប្រតិកម្មពីក្រុមអ្នកគាំទ្រលោក ថាក់ស៊ីន វិញ ថាតើពួកគេយល់យ៉ាងណាដែរ? បើសិនជាពួកគេយល់ថា ការតែងតាំងថាក់ស៊ីន ជាការបំពុលបរិយាកាសនយោបាយ របស់សៀម ឬថា ដូចជាការហុចដាវអោយប្រទេសកម្ពុជា ទៅវិញនោះ ពេលនោះអ្នកគាំទ្រ ថាក់ស៊ីន ប្រហែលជាស្រងាកចិត្ត នឹងការសំរេចចិត្តទទួលយកតំណែង របស់លោក ជាទីព្រឹក្សារបស់លោកហ៊ុន សែន។ ពេលនោះការតែងតាំង លោក ថាក់ស៊ីន នឹងគ្មានឥទ្ធិពលអ្វីចំពោះ ប្រទេសសៀម ហើយនឹងធ្វើអោយប្រជាប្រិយភាពរបស់ លោក ថាក់ស៊ីន ខ្លួនឯង សាបរលាប ខ្លាចតែ លោក ថាក់ស៊ីន អាចនឹងត្រូវចោទប្រកាន់ពីបទក្បត់ជាតិផង។
ការតែងតាំងលោក ថាក់ស៊ីន មានប្រយោជន៍ ឬ អត់ សន្លឹកបៀរឋិតលើដៃអ្នកគាំទ្រ លោក ថាក់ស៊ីន ឯណោះ។
